Subli na sab nga mag-abot alang sa usa ka rematch tali sa host Arthro Kontra Arthritis-Cebu ug sa bisitang Holcim Pryce Pharma-MisOr sa pagbalik sa aksiyon 2007 Mindanao Visayas Basketball Association (MVBA) Second Conference karong adlawa diha sa Cebu Coliseum.
Ang duwa sugdan sa alas-5:30 sa hapon.
Ang MisOr ni Gov. Oscar Moreno ug coach Bong Abad miharos sa Arthro ni Jonathan Guardo ug coach Al Solis, 2-0 aron pagdaog sa ilang labing unang MVBA conference niadtong Hunyo.
Mogiya sa depensa sa Arthro mao ang mga beteranong guwardiya nga sila si Alex Cainglet ug Doroteo Almacin ug Mark Ababon, kinsa moduwa sa unang higayon batok sa iyang kanhi koponan.
Moabag sab silang Bernie Ursal ug Ronald Bucao.
Malaumon sab si coach Solis nga ang iyang mga higanteng batos nga sila si Rino Berami ug Michael Luga makakuha na sa estilo sa ilang kaubanan human kini mibalik og duwa sa team.
Ang duwa karong adlawa motimaan sa pagsugod og duwa sa MisOr sa Visayas Division diin ila usab nga harungon ang M. Lhuillier Kwarta Padala-Cebu City ni Michel Lhuillier ug coach Raul 'Yayoy' Alcoseba ugma diha sa Cebu Coliseum ug sa Cebu Landmaster -Mandaue ni Mayor Jonas Cortes ug Jun Tan diha sa Mandaue City Cultural and Sports Complex.
Human niini, ang Arthro mao na usab ang manulong didto sa Mindanao. karong Nobiyembre 9-12. Harungong sa Arthro ang tulo ka Mindanao squads ning maong torneyo nga giagak sa Samahang Basketball ng Pilipinas (BAP-SBP) uban sa pag-abag sa ML Kwarta Padala Nature's Spring Water, Sulpicio Shipping Lines, Accel, Cokaliong Shipping Lines, Reva Sandals, Gameface.Ph ug Nike Basketball.