Walay pagkahubas ug padayon ang gipakitang pakigbisog ni Harry Tanamor sa International Amateur Boxing Association (IABA) World Boxing Championship aron pagpukan ni Ammat Ruenroeng sa Thailand sa ilang semifinal match kagahapon didto sa UIC Pavilion sa Chicago, Illinois.
Si Tanamor, ang katapusang boksidor nga nakalahutay sa seven-man sa Philippine contingent, migamit sa kinatibuk-an niyang kusog ug kaliksi aron pagpukan ni Ruenroeng, 16-8.
Si Tanamor moharong ni Zou Shimming sa China alang sa gold sa 48-kilogram category human ang naulahi mipaundang ni Nordine Oubaali sa France pinaagi sa Referee Stopped Contest Outscored (RSCO) sa ikatulong hugna.
Ang Pinoy’ng boksidor nabiyaan, 0-2 sa sayong bahin sa duwa, apan nakabawi kini second round ug miilog sa labaw, 5-4. Si Tanamor padayong mimakmak sa iyang kaatbang ug nipuntos kini'g 11-6 sa wala pa niya tapusa ang final round sa iskor nga 5-2 aron pagsakmit sa kadaugan.
Si Tanamor seguradong magkagidlay gumikan kay ang iyang ikasakbang nga si Zou nidaog man og bulawang medalya sa 2005 World Championship ug bronze medal sa 2004 Athens Olympics.