Honoridez nangandam
Hugtanon karong nangandam ang multi-titled player, coach ug organizer nga si Jessica Jawad-Honoridez alang sa bag-ong hagit diin siya mosalmot sa Philippine International Veterans’ Table Tennis Championships 2007 nga gitakda karong Nobiyembre 22-25 didto sa Ninoy Aquino Stadium.
Si Honoridez gihagad ni Charlie Lim, ang presidente sa organizing Table Tennis Association of North District (TATAND) sa pagsalmot sa maong kompetisyon.
Si Honoridez mobanat sa women’s singles 35-49 years old age classification.
Lain pang mga kategoriya sa women’s division mao ang 50-59, 60-69, 70-79 ug 80-above. Susama usab ang men’s division.
Aduna say team competition sa men ug women’s division nga naglatid sa 35-49, 50-59 ug 60-above age brackets.
Ang singles ug team events moduwa og duha ka stages. Sa first stage moduwa og round robin system, samtang ang second stage mao ang tinaktakay nga duwa.
Mga magduduwa gikan sa China, Japan, Korea, Taiwan, Australia, USA, New Zealand ug Hong Kong ang mipadayag sa ilang interes nga mosalmot sa upat ka adlaw nga kompetisyon.
- Latest
- Trending
