Mental note

Usa ka batakang bulohaton sa bilyarista ang pag-analisar sa plastada sa mga bola sa ibabaw sa lamesa. Apil na niini ang pagbanabana kun asang dapita moagi ang bolamano ug object ball human ipahigayon ang giplanong tayada sa magdudula. Kinahanglang sutaon sa magdudula ang posibleng rota sa bolamano aron iyang matino kun may opening pa ba alang sa sunod niyang pagtira.

Usahay makamatikod ta nga ang tako maoy gamiton sa magdudula pagsuta sa rota sa bola kun iya na kining tirahan. Importante  kaayo kini aron dili madiskaril ang preparasyon. Kinahanglang sutaon una sa magdudula kun wala bay posibleng babag sa iyang game plan human sa iyang pagtira.

Tingali'g wala nay opening. Tingali'g mapugos siya paghimo'g safety shot. Mao nga kinahanglang matino sa magdudula ang direksiyon sa iyang tayada aron pagseguro nga dili mopaltos ang iyang plano.

Ang Pool and Billiards Magazine nag-ingon: "It is very important to make a mental note on the path for position to the next shot while still standing."

Kini ang angay buhaton sa magdudula. Diha sa iyang kaisipan, iyang timan-an ang dagan sa bola ug ang posibleng rota niini. Sa iyang hunahuna maglatid siya'g linya nga mao kunohay ang agianan sa bola. Niini, masuta sa magdudula kun may opening pa ba ang iyang preparasyon alang sa sunod nga tayada.

Ang usa ka batid nga magdudula makahimo sa pagbanabana kun asa mohunong ang bolamano depende sa gikusgon sa iyang pagtira. Niini, angay niyang mapa-mapahon ang posibleng rota sa bola isip kabahin sa iyang game plan. Dili lisud ang paghimo niini diha sa hunahuna. Mas sayon ra sab ang pag-adjust sa magdudula sa sitwasyon kun ang iyang hunahuna nakagambalay na og mga plano.

Mao kini gibuhat sa malampusong bilyarista sa atong panahon karon. Ikaw, Tsong, posibleng mahisama usab kanila kun seryosohon mo ang pagbansay aron molambo ang imong abilidad sa billiard sport.

* * *

MAGBILYAR TA TEXTMATE PORTION: 0910-5928817, 0918-7501808, 0921-5738106 (taga Cebu City lang), 0918-3965839 ug 0910-9700890)

* * *

(Mga sugyot ug pakisayod? Text sa 0910-8105522)