13 teams kompirmadong moapil

 Miabot na ngadto sa 13 ka teams ang kompirmadong mosalmot sa 4th M. Lhuillier Kwarta Padala Inter-School Under-21 Developmental Basketball Tournament nga gikatakdang mosikad karong Nobiyembre 18 diha sa Mandaue City Cultural and Sports Complex.

Si league organizer ug M. Lhuillier Sports Development Foundation (MLSDF) executive director Eddie B. Ybañez mibutyag nga ang mga entranteng tunghaan naglangkob sa University of Southern Philippines Foundation (USPF), University of San Jose-Recoletos (USJ-R), MLSDF selection, Pajo National High School ug Compostela National High School.

Mokumbati sab ang Athletes for Christ through Evangelical Service (ACES), Consolacion National High School, Salazar Colleges of Science and Institute of Technology (SCSIT), Harumi Sportswear, Cebu Institute of Technology, University of the Visayas (UV)-Mandaue Academy, Lapu-Lapu City Selection ug University of San Carlos.

Sumala pa ni  Ybañez   nga ang mga partisipante bahinon sa duha ka bracket. Ang matag koponan moduwa og single round robin, home-and-away format sa eliminasyon diin ang top four mo-abante sa quarterfinals.

Ang top seed makigharong batok sa No. 4 ug ang No. 2 makigtige batok sa No. 3.  Ang  mga mananaog moaway sa crossover semifinals diin ang No.1 sa  Bracket A makigsangka batok sa B2, samtang ang B1 mo-asdang batok sa A2.  Ang mga mananaog maoy magbugno alang sa kampiyonato, samtang ang mga pildero magsangka alang sa ikatulo.

Gawas sa mga tropeyo, adunay  special awards nga itunol ngadto sa MVP ug Mythical Five selection ning duha ka bulan nga torneyo nga gipaluyohan sab sa M. Lhuillier Pawnshops, ML Pamilya Insurance Plans ug ML Cebu Dried Mango Delights.