Hingpit na nga nakabawos ang Cebu Landmaster ngadto sa bugtong team nga nakapilde nila human ilang gipukan ang Arthro Kontra Arthritis, 83-70, niadtong Martes sa gabii sa Mindanao Visayas Basketball Association (MVBA) 2007 Second Conference didto sa Mandaue City Cultural and Sports Complex.
Ang beteranong si Bong Marata miratsada og 13 puntos sa ikaduhang kuwarter aron pagpatilaw sa Landmaster og 17 puntos nga labaw human sa first half, 45-38. Ang mga batos ni coach Jun Tan miposte sa kinadak-an nilang labaw nga 20 puntos, 48-28, sa sayong bahin sa ikatulong kuwarter.
Apan ang Arthro ni sports patron Jonathan Guardo ug coach Al Solis mibawos og labok pinaagi nilang Alex Cainglet ug Mark Ababon nga nagkumboya og 19 puntos sa ikatulong kuwarter hinungdan nga nakasikit ang Arthro.
Nakitkitan sa Arthro ang labaw sa Landmaster ngadto na lang sa tres puntos human sa free throw ni Ababon sa nahabilin nga 53 segundos sa duwa.
Mao na lang kadto ang labing nindot nga nahimo sa Arthro gumikan kay si Mike Manigo milansang sa iyang three-point shot sa nahabilin nga 19 segundos ug dayon si Mark Yee mipasud sa duha niya ka free throws sa wala pa maselyado ang kadaugan sa Landmaster pinaagi sa iyang buzzer-beating dunk.
Si Yee mipabuto og 19 puntos, samtang si Marata midugang og 17 alang sa Landmaster nga pabiling naghari sa liderato bitbit ang 7-1 win-loss record.
Si Cainglet miposte og 23 puntos ug si Bernie Ursal mi-amot og 12 puntos alang sa Arthro nga nakatilaw sa ikaupat niining pilde sa unom ka duwa.