Gisanta sa Arthro Kontra Arthritis ang duha ka sunod-sunod niining kapildihan pinaagi sa pagdaog sa ilang duwa batok sa Goldstar Hardware-backed Duterte Agilas nga ilang gibirahan sa iskor nga 104-91 sa 2007 Mindanao Visayas Basketball Association (MVBA) Second Conference niadtong Biyernes sa gabii diha sa Cebu Coliseum.
Si Jojo Omandam mitali og sayes sa iyang nuybe puntos sa unang kuwarter aron paghatag sa Arthro ni sports patron Jonathan 'Atan' Guardo ug coach Al Solis og 25-18 nga labaw.
Sukad niadto, dominado na sa Arthro ang duwa ug hingpit nila giihaw ang Agilas human sila miposte og 23 puntos nga labaw, 102-79, human nasud ang itsa ni Omandam sa nahabilin nga 1:11 sa duwa.
Si Doroteo Almacin miratsada og 14 puntos, samtang sila si Mark Ababon, Ronald Bucao ug Bernie Ursal mitampo og 11 puntos matag usa alang sa Arthro nga nagbitbit na karon og 2-3 win-loss record.
Sila si Art Atablanco, Eliazar Berami ug Bob Cozy Ilanga nagkumboya og 42 puntos alang sa Agilas nga wala pa gyud makadagit og daog sa unom ka duwa.
Ugma ang Arthro moharong sa Cebu Landmasters sa alas-5:30 sa hapon diha sa Mandaue City Cultural and Sports Complex.
Mga iskor
Arthro-Cebu (104) - Almacin 14, Bucao 11, Ursal 11, Ababon 11, Cainglet 10, Omandam 9, Gadiane 8, Gabas 8, Garcia 8, France 7, Mercado 7
Duterte Agilas (91) - Atablanco 15, Berami 14, Ilanga 13, Sagad 10, Delica 9, Te 8, Delfin 8, Gonzaga 7, Tamayo 4, Cabili 3