Wala itugot sa kahigayonan nga mailog ni Baler Ravina ang kadaugan human makasugat og mechanical trouble hinungdan nga nailog ni Albert Basergo sa Cebu Province ang yellow jersey ug pagdaog sa Stage 1 sa Omega Pain Killer Tour of Cebu nga nanukad sa Provincial Capitol ground paingon ngadto sa Daanbantayan Municipal Hall kagahapon.
Apan dili tanang demalas ang mihapak ni Ravina gumikan kay siya man ang gitahod nga "King of the Mountain" sa stage 1 human kini makahunat didto sa dakbayan sa Danao.
Apan mitunga si Albert Basergo nga misikit og maayo ni Ravina nga nag-iyahay'g ilog sa labaw didto sa Lugo, Sogod.
Human mag-ilogay sa labaw, ang duha naabtan sa usa ka grupo sa mga seklista didto sa Lugo, Sogod.
Ang 25-anyos ug prologue winner nga si Ravina misuway pag-eskapo, apan napakyas kini dili tungod kay gilibotan kini sa 16 ka seklista kondili aduna siya'y laing namatikdan sa iyang bisikleta.
Si Ravina namat-ang mipadaplin pipila pa lang ka kilometros gikan sa Bogo proper kay gi-ayo niya ang gear sa iyang bisikleta. Hinuon, naanghelan si Ravina kay naabtan kining nag-ayo sa gear sa iyang biseklita nilang Nilo Estayo sa Manila ug teammate Edgardo Bullecer, nga nakigbaylo sa ilang mga biseklita.
Misuway og gukod si Ravina sa miarangkadang mga riders uban ni Estayo, apan si Basergo ug teammate niining si Nilo Barbalose wala na niya igkita.
Gitapos ni Basergo ang lumba sud sa duha ka oras, 54 minutos ug 40.70 segundos, samtang si Barbalose mipahiluna sa ikaduhang sa oras nga 2:54:50.17 ug si Niño Surban sa Danao City maoy miangkon sa ikatulo nga dapit sa oras nga 2:56:33.60.
Ang 28-anyos nga si Basergo, kinsa midaog sa stage 2 sa 2003 Tour of Cebu naglaum nga iyang mausban ang iyang kadaugan sa stage 1 dihang mobanat na sab kini gikan sa Daan Bantayan paingon sa Toledo.
"Ako gyung paninguhaon nga ako na gyud ning tuiga.Naa man sila Nilo para musuporta nako," matud ni Basergo, kinsa mipahiluna sa ikaduhang dapit sa overall sa 2003 edition.