Baler naghari sa ITT

Ang team captain sa Pangasinan nga si Ravina Baler, maoy naghari sa 4-kilometer  Individual Time Trial (ITT) sa oras nga 5:37 aron pag-angkon sa yellow jersey sa pagsugod  sa Omega Pain Killer Tour of Cebu kagahapon didto sa Cebu International Convention Center (CICC) dakbayan sa Mandaue.

Mipahiluna sa ikaduhang dapit mao ang team captain sa Cebu City nga si Earl Cadampog sa iyang pagsikad sa oras nga 5:37.77, samtang si Bruce Baldesama sa Butuan nga mioras og 5:38.40 maoy milangkat sa ikatulong dapit.

Nanghawod sa Team Time Trial (TTT) mao ang Danao City nga mi-oras og 5:26.27, gisundan sa Cebu Province sa oras nga 5:28.48.

Ang Pangasinan maoy mitapos sa ikatulong   dapit sa oras nga 5:29.95, milandig sa ikaupat nga dapit mao ang Cebu City sa oras nga 5:35.51 ug ang mikapyot sa ikalima nga dapit mao ang Nueva Ecija nga mioras og 5:41.23.

Ang 96 ka riders nga nirepresentar  sa 10 ka teams moratsada karong adlawa sa unang road race.

Ang stage 1 nga adunay 126.7 kilometros  sugdan karong alas-8:00 sa buntag  ug anha kini  manukad  sa Provincial Capitol ground paingon na ngadto  sa Daanbantayan sa amihanang bahin sa lalawigan sa Sugbu.