Jewelers nagsolo na sa ikaduhang dapit
Miagi pa og kakulba ang M. Lhuillier Kwarta Padala Jewelers una pa nila maangkon ang 87-82 nga kadaugan sa ilang duwa batok sa Arthro Kontra Arthritis sa 2007 Mindanao Visayas Basketball Association (MVBA) Second Conference niadtong miaging gabii sa Cebu Coliseum.
Sila si Woodrow Enriquez ug Ronald Capati maoy mihaling sa nagbagang opensa sa M. Lhuillier nga miduslit og 17 puntos matag usa, si Jayford Rodriguez midiga og 14 puntos, samtang sila si Lou Gatumbato ug Marlon Basco mitampo og 13 puntos matag usa.
Ang Jewelers ni Michel Lhuillier ug coach Raul ‘Yayoy’ Alcoseba nagsolo karon sa ikaduhang dapit sa Visayas Division bitbit ang 5-2 win-loss record.
Nagtinguha karon ang Jewelers nga mokulit sa ilang ikaunom nga daog dihang ilang harungon ang bisitang Duterte Agilas-Davao, kinsa mosugod sa ilang tulo ka road games sa Visayas Division karong alas-5:30 sa hapon diha sa Cebu Coliseum.
Bisan og siyam lang ka players, nakalahutay gihapon ang Jewelers human kini maunhi og dos puntos sa Arthro, 38-40 human masagbay ang duha ka sunod-sunod nga triples nilang Doroteo Almacin ug Jonas Mark Ababon sa nahabiling 1:12 sa dili pa ang halftime.
Nailog sa Jewelers ang labaw dihang mipabuto kini og 13-2 run sa tunga-tungang bahin sa ikatulong kuwarter sa iskor nga 51-42. Mitubo pa kini ngadto sa 60-49. Apan naungot ug wala maka-iskor ang Jewelers hinungdan nga miabot na lang og dos puntos ang ilang labaw, 60-58 human sa itsa ni Almacin sa daginutong minuto sa third quarter.
Natilawan og balik sa Jewelers ang ilang double digits nga labaw sa katapusang dos minutos sa duwa sa iskor nga 79-69.
Sa laing duwa, ang Holcim Pryce Pharma-MisOr nakatilaw na gyud og daog batok sa bisitang Goldstar Hardware-backed Duterte Agilas-Davao sa iskor nga 100-89 didto sa Xavier University Gym sa Cagayan de Oro City.
- Latest
- Trending
