Anak ni Dodie Peñalosa misidlak sa Mindanao

Wala masirohi ang Team Cebu City boxing team human ang anak ni kanhi two-division IBF champion Dodie Boy Peñalosa midaog og bulawang medalya sa 2007 Philippine National Open Youth and women’s Amateur Boxing Championships niadtong miaging adlaw didto sa Cagayan de Oro City.

Si Dodie Boy Jr. nga wala   pa maka-away og  local ug national competitions miposte og mapahayluong 28-14 nga kadaugan  batok ni Warren Batirta sa host Misamis Oriental sa school division’s featherweight class.

Ang team Cebu City mitapos sa torneyo bitbit ang usa ka gold, tulo ka silver ug duha ka bronze medals.

Si Dodie Jr. anaa karon sa unang tuig sa kursong mechanical engineering sa Southwestern University (SWU). Naglaum si Dodie Jr. nga sa maong kadaugan, tanyagan siya’g scholarship sa SWU.

Laing mga boksidor  sa Cebu City nga gipaluyohan sa IPI mao sila si Efren Tabanas (3 silvers ug 2 bronzes), featherweight  Elf Gitgano (silver),  Dondie Pumar (silver),  Benjie Espinosa (silver), Apolonio Chavez Jr. (bronze) ug Ardie Buyise (bronze).