Padayon ang pagrampa didto sa Mindanao ang Visayas Division leader Cebu Landmaster-Mandaue human nila gilubong ang Goldstar Hardware-Duterte Davao Agilas, 87-60 niadtong Biyernes sa gabii sa 2007 Mindanao Visayas Basketball Association (MVBA) Second Conference didto sa Almendras Gym sa Davao City.
Nagtabla ang duha ka kampo sa labing una ug katapusang higayon sa maong duwa, 7-all, apan ang Cebu Landmaster mipabuhagay og 12-4 run aron pag-abante og otso puntos, 19-11 human sa first period.
Sa maong duwa, napiangan ang Landmaster gumikan kay si Richard Ian Saladaga nakaangkon og gisi sa tuong bahin sa iyang kilay sa unang kuwarter pa lang hinungdan nga igo lang kini naka-iskor og dos puntos.
Si Saladaga, kinsa miiskor og 19 puntos atol sa ilang 80-72 batok sa MP Warriors-GenSan ni Manny Pacquiao niadtong Huwebes walay seguro nga makaduwa sa ilang katapusang duwa sa Mindanao batok Holcim Pryce Pharma-MisOr karong gabii didto sa Xavier University Gym.