Melindo moaway alang  sa gibakantihang trono

Nagtinguha si ALA Boxing Gym stalwart Milan Melindo nga iyang matay-og ang bisperas sa Pacquiao-Barrera II sa dihang  moharong kini ni Thai hard-puncher Nuapayak Sakkririn alang sa World Boxing  Organization Asia-Pacific minimumweight crown karong adlawa didto sa Mindanao Polytechnic State College sa Cagayan de Oro City. 

Nabakante  ang trono human ang teammate ni Melindo nga si Donnie ‘Ahas’ Nietes miaway og World Boxing Organization (WBO) 105-pound championship batok sa kanhi way pildeng Thai knockout artist Pornsawan Kratingdaenggym niadtong Septiyembre 30  sa grand ballroom sa Waterfront Cebu City Hotel and Casino sa barangay Lahug, ning siyudad.

Si Nietes midaog pinaagi sa  12-round unanimous decision batok ni Pornsawan nga maoy labing unang world boxing champion sa ALA Stable ni Antonio ‘Bidoy’ L. Aldeguer.

Sa maong kadaugan, si Nietes nahimong ikaupat nga world title-holder sa Pilipinas sunod nilang Florante Condes (IBF minimumweight), Nonito Donaire Jr. (IBF/IBO) ug Gerry Peñalosa (WBO bantamweight).

Tinguha karon ni Melindo nga mosunod sa mga  lakang ni Nietes sa iyang pakigsangka ni Sakkririn  atubangan sa iyang mga dumadapig karong gabii.

Ang 19-anyos nga si Melindo nakaaway na og 12 ka higayon ug kasagaran sa iyang mga daog  pinaagi sa desisyon. Hinuon, tulo sa iyang mga kaatbang gitumba sud lamang sa upat ka hugna ug ang katapusan niyang biktima  mao ang Boholanong si Arnel Tadena niadtong Hunyo 26 didto sa Bantayan Multi-Purpose Center sa Bantayan Island, Cebu.

Sa iyang bahin, si Sakkririn midaog og unom sa iyang pito ka away diin ang tanan pinaagi sa stoppage sud lamang sa lima ka hugna. Bugtong nakabuling sa iyang rekord mao  ang iyang kapildihan batok ni Laitai Porthongym pinaagi sa desisyon niadtong Pebrero 21.