October 2, 2007 | 12:00am
Una sa tanan, mo-greet una ko'g belated happy birthday ngadto ni Dodong Catubay sa Felicitas Village, Looc, Mandaue City nga nagsaulog sa adlaw niyang natawhan niadtong Septiyembre 2, 2007. Kini si Dodong suking magbabasa nga kanunay gyud nagsunod sa akong mga lindog. Sa iyang S. Catubay Trading sa dakbayan sa Mandaue, kanunay gibasa kining lindog bahin sa bilyar. Pero mas sikat gyud ang "Dugos Ni Eva" sa iyang mga trabahante. Salamat sa inyong suporta.
* * *
Importante kaayo alang sa usa ka bilyarista ang pagbaton og kongkretong plano sa dula. Ang usa ka magdudula nga moharong sa iyang kaatbang bisan walay giandam nga game plan walay kalainan sa sundalo nga miasdang sa gubat nga kulang sa armas ug mga bala. Wala sab siya'y kalainan sa usa ka boksidor nga misaka sa ring nga kulang sa ensayo, madugmo dayon inig-atake sa kontra.
Ang dulang bilyar nagkinahanglan og plano. Kinahanglang planohon sa magdudula ang iyang mga tayada. Kinahanglang may sundon siyang preparasyon sa dula. Kun wala siya'y giya sa iyang pagdula, daku'g posibilidad nga madiskaril ang iyang mga tayada ug sayon ra siyang pildehon sa iyang kontra. Kay sa bisan unsang dula ug pakigbisog sa kinabuhi, ang game plan mahinungdanon kaayo.
* * *
Ang Pool and Billiard Magazine nag-ingon: "The important thing is to have a plan and be willing to take the time to make a new one whenever you get out of line."
Klaro kaayo ang pamahayag sa Pool and Billiard Magazine nga mahinungdanon kaayo ang plano. Pero gawas sa gihikay nang plano, kinahanglan usab nga andam ang magdudula sa paghikay og bag-ong plano kun ugaling ang nahauna niyang plano dili mosalir. Sa laing pagkasulti, kinahanglang andam kanunay ang magdudula sa paghimo'g alternatibong plano kun ang una niyang plano dili epektibo.
Kun ang magdudula hingpit nga andam sa iyang pagharong sa iyang kaatbang, dili siya maglisod sa pagpahigayon niini. Kay ang usa ka magdudula nga nakapangandam sa hingpit andam kanunay pag-atubang sa bisan unsang komplikasyon.
* * *
(Mga sugyot ug pakisayod? Text 0910-8105522)
