Pau de Arco miarangkada

Mikulit  dayon og duha ka daog ang  Pau  de  Arco  pagsugod sa ilang kampanya sa 3rd M. Lhuillier Kwarta Padala Invitational Softball Tournament didto sa San Roque ballpark sa Subangdaku, dakbayan sa Mandaue.

Ang Pau de Arco miposte  og 7-4 nga kadaugan batok sa Isle of Man ug dayon  midaog sab kini batok sa defending champion M. Lhuillier Sports and Development Foundation  (MLSDF) sa iskor nga 8-1.

Ang Pau de Arco nag-una na karon sa liderato  bitbit ang 2-0 win-loss  nga baraha.

Si Felix Custodio, kinsa maoy mibansay sa nasudnong koponan didto sa Manila maoy bida sa Pau de Arco. Katimbang niya sila si  Joel Babatid ug Genaro Macayan aron paghatag sa Pau de Arco sa ilang kadaugan batok sa Isle of Man.

Pagka hapon, nakatilaw na sab og laing daog ang Pau de Arco human kini mi-iskor og tulo ka homeruns sa first inning ug  mi-iskor sab kini og laing duha ka homeruns sa ikatulo ug ikalimang inning ug laing run sa katapusang inning aron pagpukan sa MLSDF.