Versacool bag-ong kampiyon sa JBA

Gipalagpot na  sa Versacool Car Air-conditioning ang defending champion Lite Shipping pinaagi sa pagpilde sa iskor nga 68-63 aron pagsakmit sa korona sa 11th Jaycees Basketball Association (JBA) season niadtong Domingo sa City Sports Club-Cebu sa Cebu Business Park, ning siyudad.

Si Jeremy Huang, anak sa sports leader  Jack Huang, maoy nangulo  sa Versacool sa iyang 28 puntos.

Naglisod ang mas dagku nga Lite Shipping pagdepensa ni Huang kay nanginit  kini pag-ayo sa halos  tanang departamento ug wala kini mopakita’g kahadlok sa mas beteranong  kaatbang sama nilang Chris Sta. Maria, Joseph Jayme ug playing coach Boy Te.

Si Huang giabagan sa scoring nilang  Benedict Chua ang kanhi presidente sa Mandaue Industrial Commercial Athletics  Association (MICAA)  kinsa mipuntos og 14 ug ni Jojo Cruz nga  miamot og 11  puntos.

Sila si  Sta. Maria mao usab ang nangulo sa Lite Shipping nga mipupo og  16 giabagan sab kini ni  Jimbo Noel, kinsa mitampo og 15 puntos. Si Edmund Odulio, kinsa  maoy nangulo sa Lite Shipping sa miagi nilang duwa igo lang mi-iskor og 11 puntos.