Ang San Roque Royal United Football Club (SRRUFC) maoy milangkat sa kampiyonato sa Players 6 division sa Mint Sportshop Football Cup nga gipresentar sa Mizuno kagahapon sa Cebu City Sports Center (CCSC) field.
Ang SRRUFC ni coach Restituto Colina, mipalukapa sa Bright Academy A ug B sa ilang sangka ning double-round robin format nga torneyo.
Ang team captain sa SRRUFC nga si Angelo Colina, maoy misakmit sa prestihiyosong Most Valuable Player (MVP) award human siya mipakita og impresibong duwa sa ilang kadaugan.
Midaug ang SRRUFC booters uban ang 2-0-2 win-loss-draw standing, samtang ang Bright Academy A ug B maoy miokupar sa ikaduhang dapit human magtabla ang ilang iskor, 0-1-3 win-loss draws ug –1 goal difference.
Sa pagsulat niini, gidula pa ang quarterfinals sa Players 8. Ang Bright Academy-A nakigtige sa City Central School/ Pomeroy FC, samtang ang Springdale A miharong sa Bright Academy-B.
Sa laing bahin, ang San Roque Football Club A ug B nag-ilog usab sa quarterfinal slot, samtang ang Guiseppe FC nakigsangka sa Springdale C.
Ang ubang mga kategoriya nagdula pa sa elimination round. Ang mga duwa padayon karon sugod sa 7:30 sa buntag diha sa CCSC field.