Lancers miluba sa Panthers

Nahigmata na ang University of the Visayas (UV) Baby Lancers human gitamparos og duha ka sunod-sunod nga kaparotan dihang ilang giluba ang University of Southern Philippines-Foundation (USP-F) Baby Panthers sa iskor nga 84-78 sa pasiunang  duwa sa 7th Cebu Schools Athletic  Foundation, Inc. (CESAFI) basketball tournament kagahapon sa Cebu Coliseum.

Naglisod ang Baby Lancers sa ilang bugno alang sa ilang unang daog sa tulo ka mga duwa, apan tungod sa ilang solidong depensa sa katapusang kuwarter napugngan ang kabangis sa Baby Panthers aron pagkitkit sa maong labaw.

Ang torotoy'ng point guard nga si John Michael Abad maoy nakapalabaw  og balik  sa Baby Lancers human niya mapasulod ang  duha ka free throws, 71-70 sa nahabiling 3:54 sa duwa ug mitubo pa kini ngadto sa kuwatro puntos, 75-71 human sa basket ni  Aldwin Felisario. Bisan pa sa maong labaw wala gihapon mo-atras ang Baby Panthers. Diha na sila nakasabot dihang si Eugene Erick Viagedor miposa sa iyang crucial triple nga nakapainat og samot sa labaw sa Baby Lancers ngadto sa siyete puntos, 82-75 sa nahabiling 40 segundos sa duwa.

Si Viagedor maoy topscorer sa Baby Lancers sa iyang 19 puntos, samtang ang nangulo sa Baby Panthers mao si Ephraim Elorde nga mipupo og 15 puntos.