Pormal na gilusad kagahapon diha sa Baseline Restaurant ang "Omega Tour de Cebu" nga gitakda karong Agosto 29 hangtod Septiyembre 2 sa nagkadaiyang mga dapit sa probinsiya sa Sugbu.
Mokabat ngadto sa P800,000 nga ganting salapi ang gitagana alang sa mga mananaog ning maong karera nga gipasiugdahan sa Omega Pain Killer.
Adunay walo ka teams ang mopakita'g aksiyon ning lima ka adlaw nga bikefest. Kini mao ang Cebu City Niños, Mandaue Industrialists, Toledo Miners, Danao Planters, Lapu-Lapu Islanders, Talisay City Fishers, Bogo Millers ug Carcar Shoemakers.
Mga lider nga tagsa-tagsa ka koponan mao sila si Jovanni Delica sa Cebu City, Albert Basirgo sa Mandaue, Nilo Barbalose sa Toledo, Antonio Nebria sa Bogo ug Generito Pagnanawon sa Carcar.
Si kanhi Tour de Cebu champion nga si Robert Villaber maoy modala sa Talisay, samtang si Niño Surban mao sab ang motimon sa Danao.
Ang pedal-pushers mosugod sa prologue or individual time triam diha sa Mandaue City karong Agosto 29.
Sa sunod nga tulo ka adlaw sa Tour mao ang massed start race gikan sa Mandaue paingon sa Bogo alang sa stage 2, Bogo paingon sa Toledo alang sa stage 3 ug Toledo paingon sa Sibonga alang sa stage 4.
Ang final stage anha himuon sa Mandaue diin ang cyclists subling mopakita'g aksiyon sa criterium.