Usa ka "hero's welcome" nga giandam sa kagamhanan sa dakbayan sa Mandaue ubos sa liderato ni Mayor Jonas Cortes ang nagpaabot ni Z 'The Dream' Gorres sa iyang pagbalik gikan sa malampusong kampanya sa Estados Unidos nga naghatag og dungog sa dakbayan sa Mandaue.
Kini human si Gorres midaog pinaagi sa 8th round TKO batok sa kanhi World Boxing Council (WBC) lightflyweight champion Eric Ortiz aron paglangkat sa super flyweight crown niadtong Domingo didto sa Arco Arena sa Sacramento, California.
Ang pagmakmak ni Gorres ngadto ni Ortiz miselyado sa kadaugan sa mga Pinoy batok sa Meksikano sa multi-million Philippines vs. Mexico Boxing World Cup.
Sa katibuk-an, ang Pilipinas midaog og lima sa unom ka mga away batok sa Mexico aron pagbira sa gold ug diamond-laced US$500,000 trophy.
"The victory of Gorres is a big honor for the Mandauehanons especially that he was bringing the name of Mandaue City. We are very proud of him. We will give him a hero's welcome for him upon his return to Cebu," said Cortes.
Matud pa ni Cortes nga makig-coordinate siya sa Mandaue Big Bikers Association aron mangulo sa dakung motorkada nga mogiya sa 25-anyos nga si Gorres ngadto sa city hall diin usa ka programa ang nagpaabot sa Sugbuanong kampiyon.
"We will be preparing also a short program for Gorres and all those who are involved in his team so they will be properly honored and recognized with their efforts," dugang pa ni Cortes, himself a boxing enthusiast. "Gorres deserved the championship and I wish him continued success."
Si Gorres, kinsa nagpuyo karon sa Brgy. Ibabao, moabot ugma uban nilang ALA Stable trainer Edito ug Edmund Villamor ug sa nabantog na kaayong international promoter nga si Sammy Gello-ani.
Matud ni Cortes nga mohatag sab sila og cash incentives ngadto ni Gorres. Hinuon wala pa matino kun pila ang balor niini, apan matud pa ni vice mayor Carlo Pontico Fortuna nga mokabat kini gikan sa P10,000 ngadto sa P50,000 -- ang labing daku nga kantidad nga kasagaran nilang matunol sa mga atleta kinsa nanghawod sa mga dagkung internasyonal nga kompetisyon.
Si Gorres, kinsa nagbitbit og 27-2-1 win-loss-draw diin lima sa iyang mga biktima gipakamang human siya nahimong professional niadtong 2001, dili unta makaaway sa World Cup tungod sa problema sa mata. Apan human sa makuti nga eksaminasyon, ang American eye specialist nga si Dr. Steven Steinschriber mihatag og abiso sa Pinoy nga makaaway sa World Cup.
Mao kini ang ikaduhang higayon nga si Gorres midaog og regional belt. Iyang gipukan si Thai Waenpetch Chuwata pinaagi sa 12-round unanimous decision aron paglangkat sa OPBF super flyweight crown niadtong Marso 18 sa miaging tuig diha sa Mandaue City Cultural and Sports Complex.
Si Gorres misuway og ilog sa WBO superflyweight title, apan napilde kini pinaagi sa kontrobersiya nga desisyon ni defending champion Fernando Montiel sa Mexico sa "Moment of Truth" card niadtong Pebrero 25 diha sa Cebu City Sports Center.