Ang sports leader nga si Dr. Domingo 'Boy' Te, kinsa mao sab ang commissioner sa Jaycees Basketball Association (JBA), mipahibalo nga ilang dad-on dinhi sa Sugbu ang team Ginebra San Miguel sa PBA aron moduwa diha sa Cebu Coliseum unya sa bulan sa Oktubre.
Hinuon wala pa masayri kun kinsa ang mamahimong kontra sa Gin Kings.
Matud pa ni Te nga gisugdan na nila ang sabot-sabot uban ni PBA commissioner Noli Eala, kinsa mipasalig kaniya nga mosuporta sa maong proyekto.
Kahinumduman nga ang Jaycees ug mga ginsakopan ni Te mipasiugda og duwa sa PBA niadtong Mayo diin ang San Miguel Beermen midaug batok sa Red Bull Barakos.
Gibutyag ni Te ang maong kasayoran atol sa senemanang SCOOP Sports Forum kagahapon sa buntag diha sa Baseline Restaurant uban ang upat ka team owners ug representatives sa ilang umaabot nga 11th season sa JBA karong Domingo didto sa City Sports Club sa Ayala.
Gitug-an ni Te nga dugay na niyang gipangayo didto sa PBA office ang Ginebra nga paduwaon dinhi sa Sugbu apan wala siya tugoti ni Eala. Apan karong bag-o miuyon na si Eala sa hangyo ni Te.
Sa laing bahin, si Te mapasigarbuhong mipahibalo nga andam na ang tanan alang sa ilang torneyo sa JBA diin upat ka teams ang mag-ilog sa tropeyo nga mao ang Lite Shipping diin siya nahisakop, Versacool ni Dennis Tan, Samsung-Du Ek Sam nilang Engr. Rev Jumawan ug Marlo Monreal ug ang RC Goldline ni Chris Paroan.
Naglaraw si Te nga iyang palambuon ang JBA pinaagi sa pagdapit og daghang miyembro ug ingon man sa pagduwa sa lain-laing lugar nga aduna’y mga taga Jaycees sama sa Calape, Bohol diin si Mayor Ernest Herrera sakop sa Jaycees.