Montaña gitiwasan sa Arthro
Gi-usban og makmak sa Arthro Kontra Arthritis-Cebu ang Montaña Pawnshop-Davao, 76-61 aron pagsakmit sa kampiyonato sa 2007 Cateel Town Fiesta Invitational basketball tournament didto sa Cateel, Davao Oriental.
Ang torotoy nga si Alex Cainglet miratsada og 18 puntos, samtang sila si Jerome Gadiane ug Doroteo Almacin nagkumboya og 26 puntos alang sa Arthro ni sports patron Jonathan 'Atan' ' L. Guardo, nga milangkat sa ikaupat niini korona karong tuiga.
Sa wala pa manghawod sa Cateel, ang Arthro midaog sa Cebu City Charter Cup MVBA pre-season games, nanghawod sab sila sa Mayor Rodrigo Duterte 'Araw ng Dabaw' Invitational ug mi-angkon sa titulo sa 2007 MVBA First Conference Visayas Division.
Susamang enerhiya ang gipahungaw sa Arthro sa dihang gibuntog nila ang Montaña Pawnshop sa eliminasyon, 62-52 hinungdan nga mibulhot dayon kini aron paglabaw og nuybe puntos 19-10.
Pabilin nga nanginit ang Arthro sa sunod nga duha ka kuwarter aron pag-inat sa ilang labaw ngadto sa 15 puntos, 64-49, sa sayong bahin sa fourth quarter.
Wala na molingi pa sukad niadto ang Arthro dayon na ngadto sa pagharos og daog sa upat nila ka duwa.
"Of course I'm very happy. I'd like to commend our players for giving their all-out best and for playing with a lot of heart. They deserved this championship," matud pa ni team manager nga si Guardo.
- Latest
- Trending
