Piloto, Alcaraz nagmadaogon

Ang mga Sugboanon nga sila si Jeffrey "Marc Hojas" Alcaraz ug Engei "The Destroyer" Piloto sa Yaw-Yan Cebu ArDigma impresibo kaayo nga mikulating sa tagsa-tagsa nila ka mga kontra sa Ground & Pound III Kickboxing and Mixed Martial Arts Supreme Challenge National Championships sa miaging gabii diha sa Cebu Coliseum.

Si Alcaraz, nga mi-representa sa Jasaan Team nga tua magbase sa dakbayan sa Cagayan de Oro, nanginahanglan lamang og 48 segundos pagpasurender sa Amerikanong si Kyle "Superman" Thomas gigamit ang arm bar, samtang si Piloto migamit sa mahait niyang triangle choke aron pagpakaging ni Elmer "D Hammer" Jandayan sa Sagravate Pitfighting Society-Bohol sa oras nga 2:03 sa unang hugna.

Sa lain pang mga aksiyon sa mixed martial arts, si Maxlito "Hyper Eagle" Yong sa Yaw-Yan Musang mi-TKO ni Tata "Tornado" Galendez sa Muay Thai Butuan sa oras nga 2:44 sa ikaduhang hugna, samtang si Jovito "Young Hercules" Abellana sa Calma Stable mipaundang ni Nards "D Fire" Hernaez sa oras nga 3:29 sa ikaduhang hugna.

Si Danilo "D Crusader" Teves sa Calma Stable mipukan ni Albert "Guko" Estomago sa C-Mac Kickboxing Club sa oras nga 2:43 sa ikaduhang hugna, samtang sila si Eric "Bakki" Areglado sa C-Mac Mix ug Demetrio "D Standard" de la Torre sa C-Mac Kickboxing Club pulos migamit og guillotine choke aron pagpukan nilang Justin "The Evangelizer" Padillo sa Calma Stable ug Rene "D Thunder" Taño sa Arcomjukai Kickboxing Club sa unang hugna.

Sa kickbocing, nangu sa mga mananaog mao si  Jar-R "Matador" Villagracia sa  Yaw-Yan ArDigma Makati, nga mi-TKO ni Jober "D Survivor" Baylin sa Wushu-Sanchou Club-CDO nga mi-atras pagsugod sa ikaupat nga hugna nabuak ang ilong niini sa dihang na-igo sa tuhod ni Villagracia.

Ang stabletame ni Villagracia nga si Michael "Buhawi" Duncan impresibo sab nga mipa-surender ni Robert "D Lightning" Taño sa Arcomjukai Kickboxing Club pagkahuman sa ikatulong hugna gumikan sa injury.

Lain pang mga mananaog mao sila si Noble "The Jet" Ampoc sa Yaw-Yan ArDigma Makati, Romnick Salabante sa Yaw-Yan Aklan, Leo "D Golden Boy" Gaerlan sa Yaw-Yan Musang, Argel "D Phantom" Oppus sa Arcomjukai KC, Jessie "D Iceman" Abdaba sa Cmac KC, Dexter "Buakaw" Melon sa Muay-Thai Dumaguete, Carlo "Spartas" Hernandez sa Yaw-Yan Musang, Joric "Kidd" Rivera sa Soma Kickboxing Club, Renante "Limbas" Noblefranca sa Yaw-Yan Makati, Tangkad "Labuyo" Balcita sa Yaw-Yan Makati, Billy "Tirador" Jaresco sa Yaw-Yan Makati ug Ryan Nahil sa Yaw-Yan Aklan.