Cebuano darters tinguha maapil sa national pool

Ang mga Cebuano darters nagtinguha karon nga mahiapil sa national pool lineup diin ang gihimong taytayan mao ang DCP-SCUDA National Open Singles Darts Championships didto sa San Carlos City gikan sa Hulyo 20 - 22.

Ang mapiling darters sa Darts Council of the Philippines human sa elimination maoy ibala sa nasud ngadto sa 2008 Asia-Pacific Cup didto sa New Zealand.

Tulo na ka clubs nga nagbase sa Cebu ang nipadala na sa ilang mga batos pagsalmot sa maong torneyo, ang City Hall Employees Darts Association (CHEDA), Ramax ug ECE New York.

Ang mga pambato sa CHEDA para sa tulo ka adlaw nga liga mao silang Bert Colong Jr, Roy Laude, Winnie Ocañada, Itong Badayos, ug William Encorporado, samtang ang Ramax Darts Club nipadala nilang Raymund Sulas, Sgt.Boy Calma, ug Peter Kairuz.

Sa ilang bahin, ang Cebu ECE New York nisangun nilang Jerous Ponce, Allan Bejuna, Freddie Granada, ug Alvin Villa.

Si Anafe Villa, ang bantugan na kaayong player ug organizer, mosalmot usab sa maong torneyo ubos sa Terton. Siya ra ang bugtong female darter gikan sa Cebu nga gilaumang mahisakop sa RP Women's team.