Cebu Blue Marlins  nanghari sa Bohol

Ang Cebu Blue Marlins Swimming Team nilabni sa overall title sa 2nd Bohol Novice Age-Group Swim Meet sa miaging adlaw didto sa Bohol Coconut Palm Resort sa Baclayon, Bohol.

 Ang mga pambato sa CBM nikolekta og 27 ka gold, 26 ka silver ug  16 ka bronze medal aron pagdagit sa championship.

Nakasugakod ang CBM sa ilang lig-ong karibal nga Talisay City Life Saving and Swimming Club dihang igo lang sila nakabentaha og duha ka gold. Ang Talisaynons nitapos og 25-26-26 gold-silver-bronze.

 Ang Silliman-Dumaguete Swim Team (SDST) niloblob sa ikatulong luna nga dunay 6-10-3, samtang ang Negros maoy ikaupat sa ilang duha ka gold, tulo ka silver ug unom ka  bronze.

Samtang ang host nga Bohol  wala gyod maka-kabkab bisan usa nalang ka gold medal ug nahagba sa ikalima nga dapit bitbit ang usa ka silver ug siyam ka bronze.

Silang Kirsty Mariz Tan ug Jerose Rosada maoy nanguna sa kinabkabay og gold para sa CBM dihang nagkombuya og unom ka gold. Si Tan maoy nanghawod sa 13 years old open class samtang si Rosada maoy nidominar sa 11-12 years old bracket.

Si Cristine Indaya nagbahis sa girls 9-10 class  aron paghipos og upat ka gold, samtang si Renan Gabriel Tapang naghari sa boys 6-under class aron usab paghipos lima ka gold.

Laing pambato sa CBM kinsa nitunol sab og gold medal mao silang Justin Liam Chiongbian, Madelin Capacio ug  Danielle Angela Biscocho nga dunay usa ka gold matag usa sa 7-8 class , si Yuan Chiongbian nitampo sab og gold sa 6-under ug si Jesus Emmanuel Cubero dunay duha ka  gold sa boys 13  ug open category