Pinoy priest bond in US embezzlement case revoked

Hingpit na nga nakasulod sa finals si James Carl Cañete sa nagpadayong  12th Gullas Cup Junior Tennis Tournament kagahapon diha sa Cebu Country Club tennis courts.

Si Cañete nakakuha og tiket  sa finals sa boy's 21-under division  pinaagi sa pagposte og 6-4, 3-6, 10-1 nga kadaugan  batok sa Sugbuanong si Larry Antigua.

Harunong ni Cañete sa finals mao ang Filipino-American nga si Miguel Santiago, kinsa nakalingkawas sab kini sa kulbahinam nga duwa batok ni  Ryan Repunte, 7-5, 6-1.

Mipasilong sab  sa  finals   sa boy's 12-under ang bisitang si Kurt Gerapusco   pinaagi sa pagpukan  ni Francis Parangan, 6-4, 6-0.

Sa boy's 14-under, si Niño Siso nagpaabot na lang kun si kinsa  nilang  Christian Paul Cabahug  ug  Richard Fuentes ang  iyang ikasangka  sa semifinal. 

Sila si June Ryan Montalbo ug Israel Abarquez mao ang unang duha ka players nga misud  sa boy's 16-under pinaagi sa pagkulit og daog batok nilang Jess Anthony Espinosa, 6-2, 6-0 ug Amiel Aya-ay, 7-6, 0-6, 10-6.

Didto sa Casino Español, si  Mary Jade Capadocia mipulbos ni Clarissa Mae Fuentes, 6-2, 6-2 aron iyang harungon si  Kimberly Uytico sa final round sa girl's 12-under.

Si Uytico miabante sa final round human niya gipilde ang second seed nga si Hannah Grace Espinosa, 6-2, 6-4.

Samtang si Kirstie Barraquias nakasulod  sab   sa finals sa 18-under pinaagi sa pagpilde ni top seed Sandra Lagman, 6-4, 6-2. Si Barraquias moharong sunod ni Eloisa Collo, kinsa mipukan ni Lovelie Soquino, 6-2, 6-0.

Sa laing bahin, ang bantugang  si Vince Marc Tabotabo yano ra kaayong mikulit og daog batok ni John Paolo Javier , 6-1, 6-2 sa ilang quarterfinal action sa unisex 10-under class.

Si Tabotabo  mobanat sa semifinal round batok ni Crissi Anne Issa Kintanar, kinsa  mipukan ni Clarissa Mae Fuentes, 6-2, 6-0.

Lain pang mopakita'g aksiyon sa semis sa 10-under class mao sila si Jason Lauron ug Adrian Parangan nga nidaog batok sa tagsa-tagsa nila ka mga kaatbang.

Si Lauron midaog batok ni Charles Kinaadman, 6-4, 6-1, samtang si Parangan midaog batok ni Clyde Dujale sa mao gihapong puntos, 6-4, 6-1.