Ang MLSDF All-Stars miharos og daog sa tulo nila ka duwa sa eliminasyon human gipatikangkang ang Rich Media-University of San Carlos (USC) kagahapon sa 1st M. Lhuillier Kwarta Padala Open Indoor Volleyball Tournament diha sa University of Southern Philippines-Foundation (USP-F) Gym.
Ang MLSDF All-Stars ni coach Raffy Briones mitagak sa Rich Media-USC ni coach Eugene de la Cerna ug Jack Huang, 25-14, 25-23, 25-21 aron pag-angkon sa no. 1 slot sa women’s bracket B bitbit ang baraha nga 3-0.
Ang MLSDF All-Stars makigsangka sunod batok sa women’s bracket A second seed Hotel Fortuna/University of San Jose-Recoletos (USJ-R) ni coach Grace Antigua ug Lorenzo 'Chao' Sy, samtang ang bracket A topnotcher Horishi makigharong batok sa bracket B no. 2 Team RTM ni Fr. Rolando Manayon sa laing engkuwentro sa crossover semifinals.
Ang mga mananaog maoy mag-ilog sa korona sa women’s division ning torneyo nga gitukod ni M. Lhuillier Sports Development Foundation executive director Eddie B. Ybañez.
Ang RTM mipasilong sa semis human gipalagpot ang Arthro Kontra Arthritis-backed USP-F sa kulbahinam nilang bugno nga miabot og lima ka sets, 21-25, 25-22, 16-25, 25-22, 15-12.