SCSIT milubong sa Aldritz

Ang Salazar College of Science and Institute of Technology (SCSIT) mihipos sa ilang unang daog pinaagi sa pagpilde sa Aldritz Liniment sa iskor nga 13-2 sa 2nd M.Lhuillier Kwarta Padala Invitational Softball Tournament didto sa Ouano ballfield sa Brgy. Looc, Mandaue City.

Ang SIT nitali sa unang run sa first inning ug napun-an kini og duha sa third frame lakip na niini ang homerun ni Jackson Genolaga.

Hinuon, nigukod ang Aldritz ubos sa pagpangulo sa ilang pitcher nga si Felix Custodio, kinsa nihimo og duha ka runs sa third inning.

Apan didto ra kutob ang paningkamot sa Aldritz gumikan kay ang SCSIT mibunal og dos puntos sa sunod innings.

Gidemalas sab ang Aldritz dihang si Custodio nakaangkon og injury.

Sa laing bahin, ang M.Lhuillier Sports Development Foundation (MLSDF) selection ni-split sa ilang unang-duha ka duwa. Ang MLSDF batters niyukbo sa Pusok, 6-5, apan nakabawi kini pinaagi sa 3-0 nga kadaogan batok sa Carcar Royale.

Ang MLSDF niposte gilayon og duha ka runs sa unang inning ug napun-an og usa sa ikatulong inning aron pagpukan sa Carcar Royale.

Sa bugtong duwa sa junior division sa pito ka semana nga torneyo nga giumol ni MLSDF executive director Eddie B. Ybañez, ang Paint Works nidaog batok sa Cambaro sa iskor nga 5-2.