Pagbalik nilang Bautista ug Banal gipangandaman

Ang kagamhanan sa dakbayan sa Tagbilaran ubos ni Mayor Dan Neri Lim, nag-andam na karon alang sa usa ka bonggang "heroes'' welcome" ngadto sa duha ka boksidor nga sila si Rey ''Boom Boom'' Bautista ug AJ ''Bazooka'' Banal sa ilang pagbalik gikan sa malampusong kampanya didto sa Amerika karong Sabado.

"Sama sa miagi human siya midaog sa Amerika, among hatagan og "hero''s welcome" si Bautista ug ingon man si AJ Banal. Angayan lamang nga buhaton namo kini gumikan kay nakahatag man sila og kadungganan dili lamang sa mga Boholano kondili hasta sab sa tibuok nasudnong Pilipinhon," matud pa ni Mark Monton, ang executive assistant ni Mayor Lim, nga nahinabi sa Banat News.

Sila si Bautista ug Banal gikatakda nga moabot didto sa kaulohan karong Mayo 10. Pagka sunod adlaw, molarga sila paingon sa Tagbilaran sa alas 9:00 sa buntag. Gikan sa airport, mangu sila sa usa ka motorkada padung sa mga dagkung kadalanan sa Tagbilaran aron makakita kanila ang ilang mga pasiano.

Si Bautista nakabawi human hapit matumba sa ikapitong hugna dayon na ngadto sa pagkulit og impresibong kadaugan pinaagi sa "unanimous decision" batok sa kanhi way pildeng si Sergio Manuel Medina sa Argentina sa ilang WBO super bantamweight eliminator sa undercard sa "The World Awaits" card niadtong Domingo didto sa MGM Grand sa Las Vegas, Nevada.

Malipayon kaayo si Mayor Lim sa dalaygong abilidad nga gipakita ni Bautista batok ni Medina ug gani daku ang iyang pagtuo nga andam na si Bautista alang sa usa ka world championship fight.

"That''s a gateway to the success of his (Bautista) career. He still needs a little fine-tuning, but I fell he is ready enough for a world championship fight because it goes with his age and maturity," batbat pa ni Lim nga usa ka diehard supporter ni Bautista.

"My wish for Boom Boom is to continue on fulfilling his dream by working very hard, doing his homework well and above all, by praying more," dugang pa ni Lim.

Ang kadaugan ni Bautista naghimo kaniya nga mandatory challenger ni WBO 122-pound champion Daniel Ponce de Leon sa Mexico.

Sa iyang bahin, si Banal nagmalampuson sa labing una niyang away sa Amerika human gibuntog ang Meksikanong si Juan Alberto Rosas pinaagi gihapon sa "unanimous decision" sud sa walo ka hugna.

Ang 20-anyos nga si Bautista mi-inat sa way pilde niining record ngadto sa 23-0 (17KOs), samtang ang 19-anyos nga si Banal, lumad gikan sa Corella, Bohol, nagbitbit na karon og baraha nga (10KOs).

Ang labing mahinungdanon mao nga ang ilang kadaugan nakapalapad sa kahigayonan nga anhi mahitabo dinhi sa Sugbu ang "World Cup of Boxing" tali sa Philippines ug Mexico nga tentatibong gitakda karong Agosto 25 sa wala pa hisayring binyu.