MLKP Indoor Volleyball mosikad karon sa USC gym

Kulbahinam nga aksiyon ang masaksihan karong adlawa sa pagsikad sa labing unang M. Lhuillier Kwarta Padala Indoor Volleyball Tournament for men and women sa ala 1:00 sa hapon diha sa University of San Carlos (USC)-Main gym.

Duha ka duwa ang moabli ning usa ka bulan nga torneyo nga gipasiugdahan sa M. Lhuillier Sports Development Foundation (MLSDF) pinaagi sa inisyatiba sa maabtikong executive director nga si Eddie B. Ybañez.

Sa pasiunang duwa nga gikatakda sa alas 2:00 sa hapon, ang ML Pamilya Insurance Plans-backed University of the Visayas (UV) moharong batok sa Liloan selection ni Gerardo ''Dodong Gamay'' Frasco, Jr. sa men’s division.

Sa ikaduhang duwa, ang Richmedia Digital Ads-sponsored USC ni Jack Huang ug coach Norvie ''Making'' Labuga mo-host sa Mandaue selection sa women’s division.

Lain pang mga partisipanteng koponan sa men’s class mao ang Crunchicken-University of Southern Philippines Foundation (USPF) ni Benedict Chua ug coach Jordan Paca, Dewfoam-USC ni Dewey Choachuy, Kima Glass ni Willy Kima, USJ-R, Carcar ug Mandaue.

Samtang ang nikompleto sa women’s category mao ang Hotel Fortuna/USJ-R ni Lorenzo ''Chao'' Sy, Arthro Kontra Arthritis-USPF ni Jonathan ''Atan'' Guardo, GDS Security Agency ni Ben Sun ug team manager Ryan Aznar, The Classical Touch ni Alan Choachuy, Hiroshi ni Harou Iwanaga ug MLSDF All-Stars.

Adunay pagahimuong opening ceremonies sa dili pa sugdan ang kumbati.

Mga dinapit sa maong kalihukan mao sila si M. Lhuillier top honcho Michel J. Lhuillier, USC president Fr. Roderick F. Salazar, SVD ug Philippine Sports Commission (PSC)-7 coordinator Fr. Vicente ''Vic'' L. Uy, SVD, nga mao sab ang USC vice president for finance ug athletic director. Ang maong torneyo libre sa tanang buot motan-aw.