Team ALA nakig-alayon sa Boxing Plaza sa SK

Sa lain na sab nga lakang nga seguradong makapabaskog og maayo sa boksing dinhi sa Sugbu, kini tungod kay ang Team ALA nakighiusa og puwersa sa South Korea''s Boxing Plaza sa tinguha nga palambuon og maayo ang industriya sa boksing sa Pilipinas ug South Korea ug ingon man sa tibuok Asia-Pacific region.

"We are joining forces with these people from Korea," padayag pa ni international promoter Sammy Gello-ani sa ALA Boxing Group atol sa usa ka news conference kagahapon diha sa Sampaguita Room sa Marriott Hotel.

Mitambong sab sa maong presscon mao sila si Boxing Plaza manager Yong Min Park, promoter Lee Dong Gyu ug planning manager Han Sang Ho.

Isip una niining proyekto, ang Boxing Plaza inabagan sa ALA Boxing Gym ug SGG Promotions mopahigayon og tulo ka WBO Asia-Pacific title bouts karong Hulyo 7 diha sa Grand Ballroom sa Waterfront-Cebu City Hotel.

Gilantaw nga mowadwad sa ilang abilidad sa maong eksplosibong triple-header mao sila si WBO Asia-Pacific lightweight champion Yong Sung Kim sa South Korea, WBO Asia-Pacific super featherweight champion Czar Amonsot ug ang bag-ong sulbong nga bitoon sa ALA Stable nga si AJ ''Bazooka'' Banal.

Nanghinaut si Park nga ang umaabot nilang promosyon mopalig-on og maayo sa relasyon tali sa mga Sugbuanon ug Koreano.