Cebu teams mobanat na

Mga masidlakong bitoon sa Sugbu mosugod na sa ilang kampanya sa 2007 Nestea Beach Volley National Finals nga mosikad karong adlawa didto sa Boracay Island.

Lima sa unom sa Visayas qualifiers nagagikan sa Queen City of the South nga maoy nagduga''g kalig-on ug naghatag og higayon pag-angkon og balik sa kampiyonato nga katapusan nilang nakab-ot duha ka tuig na ang nakalabay.

Tulo sa Cebu teams nga makiglahugay ning tulo ka adlaw nga kompetisyon mao ang women’s division. Kini mao ang Visayas leg champion University of San Jose-Recoletos (USJ-R), M. Lhuillier Sports Development Foundation (MLSDF)-backed University of the Visayas (UV) ug ang Southwestern University (SWU).

Samtang ang ibala sa habig sa lalaki mao ang University of Southern Philippines-Foundation (USPF) ug ang University of San Carlos. Ang laing Visayas semifinalist mao ang Foundation University (FU) sa Dumaguete City.

Mikompleto sa women’s entries mao ang nanghawod sa Luzon nga mao ang Far Eastern University, Lyceum ug Adamson University ug ang Mindanao leg qualifiers nga gilangkuban sa Holy Cross College sa Davao ug ang University of Mindanao-Tagum (UMT).

Ang overall champion mobulsa og P150,000 paycheck ning maong torneyo nga gipaluyohan sa Speedo, Mikasa, Villa de Oro Boracay, Boracay Mandarin Island Hotel, Boracay Gold Crowne Club, Microtel Inns and Suites Boracay, Hey! Jude @ D’Mall ug D’Mall D’Boracay.

Niabag sab ang La Salle Greenhills, Schering Plough Coppertone ug ang Crystal Sand.