Si Pacquiao (43-3-2, 34KOs) nanghinaut nga makatagamtam og susama nga kadaugan sa iyang pagbalik sa maong dapit karong adlawa aron modepensa sa iyang WBC International super featherweight title batok sa walay pildeng Meksikano nga si Jorge ''Coloradito'' Solis (30-0-2, 23KOs) sa main event sa "Blaze of Glory" card.
"Nindot kaayo ning awaya ug akong buhaton tanan kutob sa akong mahimo aron modaog ning awaya. Nahibawo ko nga ang mga kababayan nakong mga Pinoy nag-ampo alang sa akong kadaugan ug dili nako sila pakyason," matud pa ni Pacquiao.
Atol sa official weigh-in kagahapon, si Pacquiao mitimbang og 128.75 libras, samtang si Solis katulo nagbalik-balik sa timbangan sa wala pa makuha ang saktong timbang nga 130 ka libras.
Si Pacquiao inilog kaayo sa maong away, apan dili kini angayan nga mokompiyansa gumikan kay basin mosumbalik kaniya ang iyang nahiaguman didto sa San Antonio. Si Pacquiao maoy biya ug way nagtuo nga modaog kini batok ni Barrera, apan iyang gitay-og ang kalibutan sa boksing human niya kulataha si Barrera hangtud nga mi-undang kini sa ika-11 nga hugna.
Mao nga angay''ng mangandam alang sa usa ka dakung gubat si Pacquiao gumikan kay si Solis kanunay og bahad nga duna siya''y sekretong armas pagpakamang sa Pinoy.
"Manny Pacquiao has fought the best fighters put in front of him. He has my respect for that. But maybe I have a few things he hasn''t seen before," matud pa ni Solis. "I respect Manny Pacquiao very much for what he has been able to do against Marco Antonio Barrera and Erik Morales. But they are not me."
Si Vic Drakulich sa Nevada maoy gitahasan nga mo-reperi sa binakbakay nilang Pacquiao ug Solis, samtang gitudlo nga mga judges mao sila si Larry O''Connell (England), Gale Van Hoy (Texas) ug Oren Schellenberger (Texas).
Sa supporting main event sa maong higanteng promosyon sa Top Rank ni Bob Arum, si two-time world champion Jorge ''El Travieso'' Arce (46-3-1, 35KOs) moharong ni defending champion Christian Mijares (30-3-2, 11KOs) alang sa WBC super flyweight title, samtang si Fil-Am Brian Viloria (19-1-1, 12KOs) nagtinguhang moilog og balik sa nahanaw niyang dungog sa iyang pakigtakos ni Edgar Sosa (26-5, 14 KOs) alang sa bakanteng WBC light flyweight title.
Lain pang Pinoy nga si Bernabe Concepcion ang mowadwad sa iyang abilidad sa undercard batok sa taga Houston, Texas nga si Benjamin Flores sa usa ka non-title fight sud sa 10 ka hugna ubos sa featherweight division.