CCUPA nangharos sa elimination round

Ang Cebu Customs United Personnel Association (CCUPA) ni Yoly Cena malampusong miharos og daog sa ilang tanang duwa sa elimination round pinaagi sa pagposte og 82-72 nga kadaugan batok sa District Collector’s Office sa nagpadayon aksiyon sa Customs Employees and Brokers Union (CEBU)-Collector’s Cup 2007 basketball tournament diha sa Mandaue City Cultural and Sports Complex.

Ang CCUPA maoy naghawod sa elimination round sa 35-above division bitbit ang 5-0 win-loss record.

Si Nilo Martelino maoy nidagkot sa opensa sa CCUPA pinaagi sa pagtusak og 10 sa iyang kinatibuk-ang 17 puntos sulod sa unang kuwarter lakip na niini ang buzzer-beater triple aron pagposte og siyete puntos nga labaw 20-13.

Ang kainit sab ni Albert Estrada mao sab ang nakapatubo sa ilang labaw sa CCUPAngadto sa 15 puntos sa iskor nga, 45-30.

Misuway pagpaduol ang Collector sa iskor nga 55-60 pinaagi sa pagpaningkamot sa ilang team captain nga si Mel Petracorta uban sa suporta nilang Rey Herbito, Jessie Alinsug ug Chin Paghasi-an, apan wala kini makalahutay gumikan kay nahutdan na kini sa oras.

Silang Estrada ug Lito Bagahansol maoy nagtambayayong alang sa CCUPA nga milansang og 18 puntos matag-usa.