CDO-UV unang hari sa Partner's Cup

Ang 6'7" center nga si Rino Berame maoy mluwas sa CDO Hamburger-University of the Visayas (UV) Green Lancers pag-angkon sa 78-63 nga kadaugan batok sa VFI Hotdogs-University of San Jose-Recoletos (USJ-R) Jaguars aron paglangkat sa labing unang CESAFI-sanctioned Partner's Cup title kagabii diha sa Cebu Coliseum.

Si Berame, kinsa wala makaduwa sa Game-3 aron pagserbisyo sa usa ka duwa nga suspenso nagmangtas sa iyang pagbalik og mikulit kini og 13 puntos alang sa CDO-UV nga mitampos sa serye, 3-1.

Bisan wala makapahimulos sa serbisyo ni Morsie Akad sa tibuok duwa tungod sa injury, ang iyang teammates nga sila si Jaysar Esperat ug Von Harry Lanete maoy mitapak ug mitimon sa opensa sa CDO-UV. Si Esperat mibugha og 16 puntos, samtang si Lanete milansang og 15 puntos.

"It was a new challenge para sa mga bata". At least naka-experience sila og pilde sa finals for the first time pero first time sab sa liga nga best-of-five ang championship kay kung best-of-three pa lang unta to, na-champion nami pag 2-0 namo",matud pa ni coach Elmer "Boy" Cabahug.

Ang mga tropeyo sa CDO ug VFI gitunol ni Partner's Cup commissioner Ramon 'El Presidente' Fernandez, ang PBA legend kinsa kaupat ka higayon nga nahimong MVP sa maong liga.

Sa tinguha nga dili masubli ang ilang kapildihan atol sa Game-3, 81-87, ang CDO-UV miarangkada og mi-abante og otso puntos, 29-37 sa nahabiling 50 segundos sa dili pa matapos ang ikatulong kuwarter. Nainat pa kini ngadto sa 20 puntos, 51-21 human sa nahabiling 4:28 sa final canto.

Gumikan sa makabungog nga labaw, ang VFI-USJ-R ni coach Edito Salacut miangkon na sa ilang kapildihan pinaagi sa pagpasulod sa iyang second stringers lakip na niini silang Lowesito Lapiz ug Marvin Duran.

Ang VFI-USJ-R gipangulohan ni Luther Justiniani, kinsa miposa og 16 puntos.