Si Lito Sisnorio, kanhi WBC Youth flyweight champion, nakabsan sa iyang kinabuhi human kini gipalukapa sa ikaupat nga hugna ni kanhi WBC flyweight champion Chatchai Sasakul niadtong Biyernes sa gabii didto sa Wat Sing School sa Thailand.
Segun sa taho sa philboxing.com, si Sisnorio natumba human maigo sa sunod-sunod nga right hooks ni Sasakul. Wala palabya ang panahon ug gihunong sa reperi ang away sa oras nga 2:35 sa ikaupat nga hugna.
Ang mga doktor dali nga mipahigayon og operasyon aron kuhaon ang "blood clot" sa utok ni Sisnorio. Apan ang pobreng taga dakbayan sa Kidapawan wala na maulii sa iyang hustong panimuot ug mipanaw kini sa alas 2:00 sa kaadlawon niadtong Sabado didto sa Piyamin Hospital sa Bangpli District, Samutprakarn, Thailand.
Si Sisnorio nagpangedaron pa og 24 anyos ug nanamilit kini sa hingpit bitbit ang lima ka daog, duha niini pinaagi sa knockout, lima ka pilde ug usa ka tabla sa 11 ka duwa sukad siya nahimong pro niadtong tuig 2003.
Una man gud sa tanan, dili unta angay nga paawayon si Sisnorio sa Thailand gumikan kay gawas nga na-knockout kini sa miagi niyang away niadtong Enero 26 sa susama gihapong nasud, mismatch kaayo ang pagtupo kaniya ni Sasakul. Si Sisnorio kausa lamang makadaog sa katapusan niyang unom ka away, samtang si Sasakul miharos og daog sa miagi niyang unom ka away.
Matud pa sa akong higala sa GAB-Cebu Office nga si Lando Mendoza nga mao kini ang dugay na kaayong modus sa ubang mapahimuslanong promoters ug ingon man managers. Pasabot pang Mendoza nga puyde man gud kang makalarga sa Thailand bisan og wala kay ‘visa’ ug passport ra ang imong dala.
Laktod pagka sulti, basta aduna lang kay plite ug kontak sa Thailand, anytime kang makapadala og boksidor aron paawayon sa maong nasud bisan og way pupananghid sa GAB.
Segun sa opinyon ni Mendoza, posibleng sad-an ang manedyer ni Sisnorio nga si Jemmel Cantayoso. Nagkanayon si Mendoza nga ang usa ka boxer dili makalarga sa bisan asang nasura kun walay go-signal sa iyang manager. Kun ihimakak ni Cantayoso nga wala siya'y kalambigitan sa paglarga sa iyang boksidor sa Thailand, angayan gihapon siyang ipaubos sa makuting imbestigasyon.
Apan si Mendoza nagkanayon nga angayan sab pakgangon kining mga Thai promoters nga nakigkunsabo sa utro sang mapahimuslanon nga Pinoy nilang kontak aron makakuha og boksidor nga dili mag-agi sa hustong ahensya sa atong kagamhanan.
Mao nang way epek ang aksiyon ni GAB chairman Eric Buhain sa temporaryo niining pag-ban sa mga Pinoy boxers aron mo-away didto sa Thailand.
Luoy intawon ang mga pobre natong boksidor nga misugal sa ilang kinabuhi sa mga hiwi nga promoters ug managers nga mipahimus sa ilang dugo ug singot nga wala man lang gani magpakabana sa mapait nilang sitwasyon ug kahimtang sa ilang panglawas.
Daghan na ang nakalas nga kinabuhi sa boksing ug hinaut nga katapusan na ang nahitabo ni Sisnorio. Mamahimo unta kining leksiyon sa tanang promoters ug managers nga intawon hatagi pud og gamay'ng dignidad ug kaluoy ang inyong mga boksidor inay nga inyo silang itukmod sa kadautan sa ilang panikaysikay nga makapangita og kuwarta aron ikabuhi sa tagsa-tagsa nila ka pamilya.