Ubay-ubay nangapil sa Sunsport training camp

Daghang mga bata ang nagparehistro sa Sunsport Basketball Training Camp 2007 nga gisugdan niadtong Abril 1 hangtod sa Abril 27 diin ang mga ginikanan nipadayag sa ilang dakung pagsalig sa Sunsports nga miabot na og 12 ka tuig pagtudlo sa basic fundamentals sa maong natad sa paugnat sa kusog ngadto sa ilang mga estudyante, kinsa nangandoy nga mahimong inila nga magduduwa sa tibuok nasud.

Gawas sa ilang makat-onan sa training, makaseguro sab ang mga campers nga dili mausik ang ilang kuwarta tungod kay makadawat man sila og custom-made Sunsport freebies sama sa basketball, back pack, ball bag, t-shirt ug jersey atol sa ilang pagparehistro.

Ang ikaduhang hugna sa training pagahimuon sa Mayo 1- 25 diha gihapon sa New Sacred Heart Sports Center sa D. Jakosalem street, ning siyudad.

Alang sa dugang kasayoran kontaka lang ang Sunsport Headquarters sa numero 345-1015 o sa 0917-3205769.