Sirlitz One-on-One cage camp gitakda

Sulod sa tulo ka sunod-sunod nga katuigan, ang Sirlitz One-on-One Summer Basketball Clinic nagpamatuod nga mas daghan kini og mga partisipante ug sa pagka karon aduna na kini 80 ka estudyante ang nagpalista. Si head trainor Edsel Vallena, mipahibalo nga nagpadayon pa ang enrollment.

Ang tinuig nga Sirlitz cage clinic himuon karong Abril 28 diha sa Guadalupe Sports Complex. Bahinon kini sa duha ka sessions.

Ang first session magsugod sa alas-8:00 hangtod sa alas-10:00 sa buntag alang niadtong nagpangedaron og 6-anyos ug pataas, samtang ang ikaduhang session sugdan sa alas-10:00 sa buntag hangtod sa alas-12:00 sa udto niadtong nagpangedaron og 13-anyos pataas.

Si Vallena, kinsa maoy responsable sa pagsakmit sa Skygo og back-to-back championships sa Cebu Basketball Federation (CBF), nigamit og Korean ug American style sa basketbol sa iyang training module aron mahatagan og empasis ang shooting kay sa dribbling.

Si Vallena, kinsa kanhi trainer sa RP Team Visayas nga gipaluyohan sa Cebuana Lhuillier, nagkanayon nga laing vital component sa iyang instructional program mao ang paghimo og tukmang pasa ug pagpalambo sa excellent footwork.

Sa unang tuig sa Sirlitz clinic, kapin sa 100 ka estudyante ang nisalmot ug sa miaging tuig, dul-an sa 100 aspiring hoopsters ang nibalik og pa-enroll.

Ning tuiga, gilauman ni Vallena nga moabot gihapon sa susamang gidaghanon sa mga entrante ang mosalmot.

Ang Sirlitz training camp maoy kinabaratohan nga training camp nga aduna lamang kini registration fee nga P1,000 apil na niini ang libreng basketball ug upper jersey.