Cebu City Dancesport miani 5 ka bulawan

Ang Team Cebu City-Dancesport milangkat og lima ka gold medals sa gipahigayong Singapore Millennium 2007 didto sa Suntec City, Singapore.

Si Cebu City Sports Commission dancesport directress Eleanor Hayco ug Tom Ingan padayong mipakita sa ilang abilidad sa dancefloor aron pag-angkon sa titulo sa senior latin division.

Ang tandem nilang Jefferson Pimentel ug Diane Balili wala sab magpabitin ug mibira kini og duha ka gold medals sa junior latin open ug junior latin close (Asia) battle.

Ang ikaupat nga bulawan nakuha kortesiya nilang Nino Otero ug sa iyang partner nga si Arlyn Afable sa latin grade C.

Sila si Dondon Meras ug Samantha Ho mipakita sab sa ilang maayong gilas aron pagdaog sa novice division sa latin discipline.

Sa laing bahin, ang DTCC nga gipangulohan ni Eleanor Hayco mo-promote sab og dancesport activities nga mahitabo dinhi sa Queen City of the South sa mosunod nga mga buwan ngadto sa mga mahiligong dance athletes gikan sa laing kanasoran.