Basirgo miarangkada

Ang Sugbuanong si Albert Basirgo mipukan sa tang-an nga si Niño Surban sa pagsugod sa elimination round sa Tour Pilipinas-Padyak Pinoy kagahapon.

Ang maong lumba diha nanukad sa Cebu International Convention Center (CICC) sa Mandaue City reclamation area paingon sa Bogo og balik sa CICC.

Si Basirgo miarangkada og maayo batok sa iyang mortal nga kaatbang nga si Surban, kinsa gipaluyohan sa Danao City Sports Commission ug Nagashima, usa ka metro na lang ang gilay-on gikan sa finishing line aron pagdaog sa lumba.

Sa sayong bahin sa lumba, si Surban ug laing duha ka Sugbuanong maoy midominar gikan gikan sa pagsukod hangtod na sa turning point didto sa Bogo.

Apan dili pa angayan magsaulog si Basirgo kay aduna 16 pa sa 30 ka mga entrante ang nakaabot sa final nga molangkob sa duha ka teams sa Visayas ug Mindanao region.

Paninguhaon karon ni Basirgo nga iyang mamintinar ang average speed nga 40 kilometros matag takna sa individiual time trial nga manukad sa Danao City paingon sa Sogod ug balik.

Ang 3-time Tour campaigner nga si Robert Villaver mipahiluna sa ikatulo nga dapit, gisundan kini ni Nilo Barbalose sa Toledo nga nitongtong sa ikaupat nga dapit. Niokupar sa ikalima nga dapit mao si Dexter Nonato.