5 Cebu teams nakasulod sa finals

Giharos sa Cebu teams ang lima sa unom ka lingkoranan sa Visayas region alang sa final battle sa Nestea Beach Volley 11 nga adto ipahigayon sa Boracay Island sunod buwan.

Ang M. Lhuillier Sports Development Foundation (MLSDF)-supported University of the Visayas (UV) ladies team siguro na makasulod sa final outing sa championship match batok sa laing Cebu team, ang University of San Jose-Recoletos (USJ-R) Lady Jaguars didto sa De La Salle-Greenhills sand courts.

Ang UV team ubos sa tandem nilang Janiz Igot ug Jusabelle Brillo miposte og 21-11, 21-14 sa semifinals batok sa Southwestern University (SWU) Lady Cobras.

Sa pikas bahin, sila si Gennie Sabas ug Jullet Marikit sa USJ-R ubos ni coach Grace Antigua sigurado na sab nga maadto sa Boracay human nila gipilde ang Verano sisters nga sila si Yvonne ug Ericka Camille sa University of Southern Philippines Foundation (USPF) sa iskor nga 21-16, 21-14.

Ang SWU ug University of Southern Philippines-Foundation magtinaktakay alang sa katapusang luna sa women’s division.

Sa men’s side, ang USP-F ug University of San Carlos (USC), nakakuha sab og luna sa finals didto sa Boracay.

Ang mga pambato ni coach Cecil Jotojot nga silang James Rivera ug Roland Melencion sa USP-F nakalingkawas pinaagi sa pagposte og 21-18, 21-10 nga kadaugan batok sa University of Negros Oriental-Recoletos.

Gidominar sa USP-F ang ilang duwa batok sa Foundation University of Dumaguete City, 21-17, 21-17, aron pag-abante ngadto sa championship round.

Ang USC, sa ilang bahin nakaangkon sa ilang unang kapildihan human kini gipilde sa University of San Agustin, 16-21, 18-21, apan nakabawi kini sa ilang do-or-die match batok sa University of St. La Salle (USLS)-Bacolod, sa iskor nga 21-18, 19-21, 15-9.

Ang USC gihugpongan sa puwersa nilang Carlo Tecson ug Roderick Arenasa, uban sa ilang coach nga si Eugene dela Cerna.