Makinano midominar sa Coleto itaas

Si Anthony Makinano, kinsa kandidato pagka International Master, nagsandig sa halapad niining kasinatian aron pagpukan ni Joel Pacuribot sud sa duha ka sunod-sunod nga higayon dayon na ngadto sa pagdominar sa 3rd Coleto L. Itaas Active Open Chess Tournament sa miaging gabii diha sa Bibo Chess Club.

Ang 36-anyos nga si Makinano mimartsa ngadto sa final round human gipilde si Kim Steven Yap ug ingon man si Pacuribot, kinsa nidaog sa 10-minute blitz tie-breaker batok ni Allan Salientes aron pag-angkon sa katapusang luna sa kampiyonato.

Sa duha ka duwa sa finals, si Makinano mipilde ni Pacuribot sa ilang Queen's Pawn game ug dayon migamit og Ruy Lopez opening aron pagpilde sa iyang kontra sa ikaduhang higayon

Si Makinano, nga naka-angkon og IM norm ug automatic FIDE Master title human mikulit og 7.0 puntos sa Dato Arthur Tan 3rd Malaysian Open sa miaging tuig didto sa Kuala Lumpur, Malaysia, mibulsa og P3,000 ug ingon man tropeyo nga gidonar ni Andres Ruaya.

Si Pacuribot midawat og P2,000, samtang sila si Salientes ug Yap mibulsa og P800 matag usa. Ang duha ka pilderong quarterfinalists nga sila si NM Rogelio Enriquez ug Richard Natividad gitunolan og P300 matag usa.

Si Gertrudes V. Itaas mao mismo ang mihatag sa mga ganting salapi ug tropeyo sa mga mananaog ning maong torneyo nga gisuportahan ni US-based WNM Susan Itaas. Miabag sab og hatag si national arbiter Marvin Ruelan.