CDO-UV niangkon sa Game-1

Ang CDO Hamburger-University of the Visayas (UV) Green Lancers walay puangod nga milubong sa VFI Happy Booster Hotdogs-sponsored University of San Jose-Recoletos (USJ-R) Jaguars, 101-78 sa Game-1 sa ilang "best-of-five" Partner’s Cup finals niadtong miaging gabii diha sa Cebu Coliseum.

Ang duha subling mag-abot ugmang adlawa alang sa Game 2 sa alas-5 sa hapon diha sa Cebu Coliseum. Ang presensiya ni CDO team owner Jerome Ong maoy nakapadasig sa duwa sa UV Lancers nga nagpabaha sa ilang mga opensa aron paglumos sa kaatbang niining VFI-USJR Jaguars.

Kahinumduman, ang CDO Burger-UV Lancers mipaso sa finals human nila giharos og daog ang Metro Gaisano-University of Cebu (UC) Webmasters sud sa duha ka duwa.

Si Morsie Akad maoy mitimon sa Lancers nga milansang og 16 puntos, gisundan ni Michael Luga, kinsa miamot og 12 puntos, si Eduardo Arda midugang og 10 puntos.

Ang VFI-USJR igo lang nakapaduol og nuybe puntos, 29-38 sa sayong bahin sa ikaduhang kuwarter tungod kay ang CDO Burger-UV miarangkada man hangtod na sa pagkapupos sa oras sa ilang duwa.

Sa pikas bahin, si Lyndon Gudez maoy nangulo sa pilderong VFI- USJ-R bitbit ang 18 puntos,samtang si Luther Luke Justiniani niabuno og 17 puntos.