Warrior gyud si Kiamco

Ang Sugbuanong bilyarista nga si Warren Kiamco gitawag og "warrior." Mao kini ang gidala niyang monicker sa iyang pagdula og bilyar. Dili pa lang dugay, gipamatud-an ni Kiamco nga angay gayod siyang tawgon nga "warrior" sa iyang pag-apil sa 14th Annual US Bar Table Championship 9-Ball Division nga gipahigayon didto sa SAns Regenct Hotel sa Reno, Nevada, USA.

Si Kiamco maoy nahimong kampiyon sa maong prestihiyosong torneyo. Gipakita niya ang iyang pagka-warrior sa iyang pagsakmit sa titulo sa nahisgutang torneyo nga giapilan sa 144 ka magdudula. Dili sayon alang kaniya ang pagsakmit sa kampiyonato tungod kay pulos dekalibreng mga bilyarista ang iyang gikasangka.

Si Kiamco, kinsa bag-o lang nagpasakop sa Bugsy Promotion stable ni Perry Mariano, nakadawat og $5,000 dolyares tungod sa maong kadaugan niya sa 14th Annual US Bar 9-Ball. Mao kini ang labing unang major title ni Kiamco sa tuig 2007. Posibleng madugangan pa ang maong titulo kun magpadayon ang maayong performance sa billiard table sa 36 anyos nga si Kiamco sa dili pa matapos kining tuiga.

Aron makaseguro pagkuha og hot seat, si Kiamco mipilde kang Rafael Martinez sa quarterfinals. Pero gisuwerte nga nakaabot usab si Martinez sa finals ug subli silang nagkasangka si Kiamco. Apan wala mokompiyansa si Kiamco. Iyang gipilde pag-usab si Martinez via 9-5 nga victory.

Sa wala pa makaabot sa hot seat match, si Kiamco nga mikuha og bye sa first round mipukan nila ni Mike Wells, Jason Marcoullier, Damian Overton, Tinsley Johnson, James Walden, Dave Martin ug ni Martinez. Ingon sa determinado gayod kaayo si Kiamco nga modaog kay walay kulba niyang gipaluhod ang maong mga magdudula.

Sa iyang bahin, si Martinez mipilde usab ni Shane Van Boening aron makaabot sa finals alang sa rematch nila ni Kiamco. Apan ang abilidad ni Martinez wala gyud magsilbi sa kalibre sa three-time Southeast Asian Games gold medalist nga si Kiamco. Gipahimuslan ni Kiamco ang momentum nga iyang nakuha mao nga iyang gitiwasan si Martinez sa finals.

Kini maoy laing pamatuod nga superyor ang abilidad sa mga Pinoy bahin sa bilyar.

* * *

(Mga sugyot ug pakisayod? Text sa 0910-8105522)