USJ-R mipanit sa SWU

Gipanitan na sab sa University of San Jose-Recoletos (USJ-R) Jaguars ang Southwestern University (SWU) Cobras sa Game-2, 78-73 aron pagsakmit sa labing unang kampiyonato sa Visayas Amateur Athletic Association (VAAA) men's basketball tournament sa miaging gabii diha sa University of San Carlos (USC) main gym.

Gilangkat sa La Fortuna Hotel-sponsored Jaguars ang makasaysayanong korona pinaagi sa pagharos og daog sa ilang "best-of-three" finals series.

Si Lyndon Gudez mao na sab ang responsable sa kadaugan sa Jaguars pinaagi sa pagtali og 22 puntos, samtang si Bobby Hatague mikulit og 11 sa iyang 13 puntos nga maoy nakahatag og 13 puntos nga labaw sa USJ-R paghuman sa first half, 46-33.

Wala sab magpabitin si Archie Antigua, kinsa mikulit og 12 puntos, lakip na niini ang sunod-sunod nga sayes puntos nga maoy naghatag og 12 puntos nga labaw sa Jaguars, 71-59 sa tunga-tungang bahin sa duwa.

Nakapanimaho na og daog ang Jaguars human sila miposte sa kinadak-an nilang labaw nga 15 puntos sa iskor nga 78-63 sa nahabiling 2:26 sa duwa.

Ang Cobras misuway og gukod pinaagi sa pagpabuto og 10-0 run apan napakyas kini gumika kay nakabsan na sila sa oras.

"Didto mi nakabentaha sa depensa. Pag-rally sa SWU, among gi-usab among depensa gikan sa 2-3 zone ngadto sa man-to-man hangtud nga na-control na gyud namo ang duwa," matud pa ni USJ-R head coach Edito Salacut.

Nangulo sa SWU mao si Gilbert Gallarde bitbit ang 20 puntos, samtang si Chris Litorja midugang og 16 puntos, lakip na niini ang duha niya ka sunod-sunod nga 3-pointers nga maoy nakapasikit sa SWU ngadto sa 53-55 sa nahabilin nga 1:23 sa ikatulong kuwarter.