Atan Guardo, Juskit nikulit na sab og daog

Mikulit na sab og laing daog ang Atan Guardo ug Juskit pinaagi sa pagpilde sa ilang tagsa-tagsa nila ka kaatbang sa Sambag I Christmas Cup basketball tournament diha sa Sambag I Sports Complex.

Sa pagsugod pa lang, gibanatan dayon sa Atan Guardo aron pagpukan sa Lanron Sports, 83-77, sa seniors division, samtang ang Juskit nimasaker sa Upper Kawayan, 87-73, sa juniors category.

Si Ariston Cabahug nipabuhagay og 30 puntos ug si Mando Pineda niamot og 20 puntos alang sa Atan Guardo, kinsa nilabaw og 10 puntos, 26-16, sa sayong bahin sa duwa ug giinat pa kini nila ngadto sa 16 puntos, 71-55 sa ikatulong kuwarter.

Misuway og gukod ang Lanron Sports pinaagi sa 22-12 run apan wala kini magsilbe gumikan kay padayon man nga nagdilaab ang opensa sa Atan Guardo.

Nangulo sa pilderong Lanron Sports mao si Ramil Bastida sa iyang 25 puntos.