Binakbakay sa Dalaguete

Tinguha ni JR Sollano sa Rex 'Wakee' Salud Stable nga molampos sa labing daku niyang away sa iyang career sa iyang pakigbinakbakay batok ni Donie Boy Agrabio sa Manila alang sa bakanteng Philippine superfeatherweight championship nga maoy main event sa Dalaguete boxing card karong gabii didto sa Dalaguete Sports Complex.

Sila si Sollano (11-5, 8KOs) ug Agrabio (6-3-1, 1KO) magbinukbukay ibabaw sa ring sud sa 12 ka hugna.

Seguradong eksplosibo ang kumbati nilang Sollano ug Agrabio gumikan kay pulos man sila pay pilde sa katapusan nilang tulo ka away,

Si Sollano mipakamang ni Dondon Lapuz sa ikaupat nga hugna aron pagsakmit sa PBF lightweight title niadtong Agosto 25 sa miaging tuig didto sa Gusa dakbayan sa Cagayan de Oro.

Ang maong kadaugan gipatung-an sa pagpakamang sa Hapon nga si Tomoya Matsuda sa ikaduhang hugna ug ang makalisang niining pagtumba ni Hayato Takabayashi sud lamang sa unang hugna niadtong Oktubre 8, 2005 didto sa IMP Hall sa Osaka.

Sa iyang bahin, si Agrabio mihipos og daog batok nilang Elmer Saligumba ug Roel Laguna, nga pulos pinaagi sa desisyon. Si Agrabio dili basta-basta gumikan kay wala pa kini malukapa sa iyang career.

Sa supporting main event sa maong promosyon nga gipasiugdahan sa RWS Promotions International inabagan sa lokal nga kagamhanan sa Dalaguete ubos sa liderato nilang Mayor Ronald Allan G. Sesante ug Vice Mayor Andrade Alcantara, si kanhi two-time PABA light flyweight champion Marvin 'Leyte Bomber' Tampus makigpinaksitay batok ni War Bartiquel gikan sa Zamboanga.

Sa laing 10 ka hugna nga kumbati, si Roel Laguna makigharong ni Malvin Ayudtud sa Cagayan de Oro City.

Naghinam-hinam na sab ang mga Dalagueteños nga mosaksi sa away sa ilang garbo nga sila si Vergelio Silvano ug Christopher Antenero. Si Silvano makigtige batok ni Gil Castro Mayor sa Cagayan de Oro City, samtang si Antenero moharong batok ni Romart Sentillas sa Mandaue City.

Mopakita'g aksiyon sa preliminary bouts mao sila si Jimmy Siscon vs. Jun Jamlan ug RH George vs. Jimbert Lamoste.

Gipaluyohan sab sa Sangguniang Kabataan Federation of Dalaguete, ang maong kalihukan kabahin sa tinuig nga pangilin sa ilang mahal nga patron St. William of Aquitaine.