Kwarta Padala nisakmit sa korona

Ang M. Lhuillier Kwarta Padala-Cebu City Jewelers nagsalig sa ilang kasinatian sa kampiyonato nga maoy ilang gihimong hinagiban sa pagpatikangkang sa Holcim Pryce Pharma-MisOr, 72-67, aron pagsakmit sa korona sa Mindanao Visayas Basketball Association (MVBA) Gov. Oscar Moreno Cup niadtong Martes sa gabii didto sa Xavier University Gym sa Cagayan de Oro City.

Ang duha ka beterano nga sila si Danny Aying ug Stephen Padilla maoy bida sa gipabutong 13-2 run pagsugod sa katapusang kuwarter nga maoy nakahatag sa M. Lhuillier nilang basketball patron Michel J. Lhuillier ug head coach Raul Alcoseba og 64-54 nga bentaha sa nahabilin nga singko minutos sa duwa.

Gumikan sa abiba sa ilang mga dumadapig, ang MisOr ni MVBA Chairman Gov. Oscar S. Moreno ug coach Rex Salvana mibawos og labok aron pagsikit sa iskor nga 67-70 human sa duha ka free throws ni Lowell Briones sa nahabiling 32 segundos sa duwa.

Apan mao na kadto ang katapusang ginhawa sa MisOr gumikan kay si Padilla milansang og duha ka free throws gikan sa foul ni Mark Ababon aron pagselyado sa kadaugan sa Jewelers sa nahabiling otso segundos.

Sa maong kadaugan, ang M. Lhuillier mibulsa og P100,000, samtang ang MisOr nakadawat og P75,000.

Si Padilla maoy nangu sa M.Lhuillier bitbit ang 25 puntos. Si Woodrow Enriquez miamot og 15 puntos ug maoy gikoronahang MVP gumikan sa mas taas nga average nga adunay 17 puntos matag duwa.

Sa pasiunang duwa, ang Lanao Royals ni Gov. Imelda Q. Dimaporo maoy miangkon sa P50,000 nga ganti alang sa ikatulong dapit human gipakauwawan ang guest team Pagadian City, 70-68. Ang Pagadian nakabulsa og P25,000.