Sollano moharong ni Agrabio

Si JR Sollano (11-5, 8KOs) sa RWS Stable mag-atubang sa labing daku nga away sa iyang career gumikan kay makigharong siya batok n Dodie Boy Agrabio (6-3-1, 1KO) sud sa 12 ka hugna alang sa Philippine super featherweight championship nga maoy main event sa lain na sab nga kulbahinam nga Dalaguete boxing promotion karong Sabado diha sa Dalaguete Sports Complex.

Si Sollano, nga giatiman sa notadong Sugbuanong promoter nga si Rex 'Wakee' Salud, impresibo kaayo sa katapusan niyang tulo ka away, duha niini didto giduwa sa Japan. Iyang gipakamang si Dondon Lapuz sa ikaupat nga hugna aron pagsakmit sa PBF lightweight title niadtong Agosto 25 sa miaging tuig didto sa Gusa, Cagayan de Oro City.

Sa miagi niyang away, si Sollano mangtas kaayo gumikan kay nanginahanglan lamang kini og 80 segundos aron pagpakamang sa Hapon nga si Hayato Takabayashi niadtong Oktubre 8, 2005 didto sa IMP Hall sa Osaka, Japan.

Hinuon si Agrabio wa say pilde sa katapusan niyang tulo ka away, apil na niini ang pagbuntog niya nilang Elmer Saligumba ug Roel Laguna pinaagi sa desisyon.

Sa supporting main event sa maong ekslosibong card nga gipasiugdahan sa RWS Promotions International inabagan sa lokal nga kagamhanan sa Dalaguete ubos sa liderato ni Mayor Ronald Allan G. Sesante ug Vice Mayor Andrade Alcantara, si kanhi two-time PABA light flyweight champion Marvin 'Leyte Bomber' Tampus makighamag ni War Bartiquel sa Zamboanga.

Sa iyang bahin, si Roel Laguna makigbinukbukay batok ni Malvin Ayudtud sa Cagayan de Oro City sa laing 10 ka hugna nga binakbakay na maong promosyon nga libre sa publiko.

Sila si Vergelio Silvano ug Christopher Antenero makigsangka nilang Gil Castro Mayor sa Cagayan de Oro City ug Romart Sentillas sa Mandaue City.

Mo-away sab sa preliminary bouts mao sila si Jimmy Siscon batok Jun Jamlan ug RH George batok Jimbert Lamoste.

Ang maong boxing promosyon nga gipaluyohan sab sa Sangguniang Kabataan Federation sa Dalaguete kabahin sa selebrasyon sa tinuig nga kapistahan sa ilang mahal nga patron St. William of Aquitaine.