30 ka magduduwa 'himbisan

Katloan sa 90 ka aspirants ang nakalahutay sa unang hut-ong sa ilang tahas sa Nike Elite Camp try-outs kagahapon diha sa Sacred Heart School-Jesuits gym sa Gen. Maxilom Avenue, ning siyudad.

Apan adunay laing lisud nga tahas ang nagpaabot sa 30 ka survivors, diin ang mga organizers mohashas og maayong high school players, kinsa maoy ipadala sa usa ka semana nga Nike Elite Camp karong Marso 30 ngadto sa Abril 4 didto sa Mampalsan Laguna.

Si International Basketball Academy (IBA) director Alex Compton maoy nangunay pagdumala sa maong tryouts uban sa iyang assistance coaches nga si Eric Altamirano ug Ato Badolato ug ubang staff gikan sa Nike-Manila.

Niabag sab sa maong kalihukan ang local high school coaches, kinsa mga sakop sa Cebu Schools Athletic Foundation, Inc. (CESAFI).

Ang mga coaches nga niabag mao sila si CESAFI juniors champion coach Reggie Licanda sa University of Cebu (UC), Delfin Pepito Jr. sa University of the Visayas (UV), Roland Remedio sa University of San Carlos (USC) ug kanhi PBL star Joel Co.

Ang niapil sa tryouts mao silang Edrian Lao ug Phil Mercader sa UV, Pelayo Cabañero III, Mark Madison Rago ug Raymund Babad sa UC, Robert Gines Codilla, Joules Frazier, Dan Junior Bercede ug Bryan Negapatan sa USC, Clint Joseph Caritan, Darly Cabanes, Miguel Corominas ug John Santos sa University of San Jose-Recoletos (USJ-R), Francis Dysam, Lawrence Miguel Maraño, Philip Muñez ug Raymund Olivar sa University of Southern Philippines-Foundation (USPF), Ray Lapitan, John Joseph Parilla ug Mark Rodriguez sa Don Bosco ug Elmer Cabahug Jr. sa Sacred Heart School.

Adunay 17 ka players nga nagagikan sa USC North ug South Campus misalmot sa tryouts, 12 gikan sa USP, 10 sa UV ug laing 10 sa Sacred Heart, pito sa UC, lima sa Don Bosco, upat gikan sa USJ-R, tagduha sa Salazar Institute of Technology (SIT) ug St. Louie Academy sa Mandaue ug usa gikan sa Bohol Institute of Technology (BIT).

Matud pa ni Compton nga ang Bacolod tryout napahigayon na niadtong miaging semana ug sama sab nga try-out ang ipahigayon didto sa Davao, Manila, Pampanga ug sa Baguio City.